 Вялікдзень – адно з найбольш любімых і ўрачыстых святаў беларусаў. Здаўна валачобніцтва было важнай часткай святкавання Вялікадня ў Беларусі. Валачобнікаў чакалі ў кожнай хаце. Людзі верылі, што яны спрыяюць дабрабыту сям’і. Кожны год народны фальклорны калектыў “Кругліца” ходзіць з гэтым абрадам па вёсках свайго мікрараёна. Не стаў выключэннем і гэты год. Удзельнікі калектыву 2 мая года прайшлі з абрадам “Валачобныя-людзі добрыя” па пяці вуліцах в.Кругліца, у час якога ўдзельнікі звярталіся з просьбай да гаспадароў адарыць валачобнікаў пачастункамі і жадалі гаспадарам дабрабыту, моцнага здароўя, поспехаў у вядзенні гаспадаркі,спявалі валачобныя песні, у якіх услаўлялі Уваскрасенне Хрыстова, а таксама дзякавалі за пачастункі. Гаспадары добразычліва прымалі валачобнікаў і былі вельмі ўдзячны ім за віншаванне і цёплыя пажаданні, запрашалі наведаць іх і ў наступны год на Вялічка. Відыё з гэтым абрадам можна паглядзець на старонцы В.Хадасевіча ў “Аднакласніках”.
|
